நீரா ராடியாவுடன் உரையாடல், ஸ்பெக்ட்ரம் ஒதுக்கீடு குறித்து அமைச்சர் ஆ.இராசா சிறப்பு நேர்காணல்

ஜூனியர் விகடன் இதழுக்கு தொலைத்தொடர்பு மற்றும் தகவல் தொழில்நுட்பத் துறை அமைச்சர் ஆ.இராசா அளித்த சிறப்பு நேர்காணல்...

வினா: ''வருமான வரிப் புலனாய்வுத் துறையினர் பதிவு செய்ததாகச் சொல்லப்படும் தொலைபேசி உரையாடல்களில் தனியார் டெலிகாம் 'லயஸன்' அதிகாரி நீரா ராடியாவும் நீங்களும் பேசியதாக வெளியாகும் தகவல் பற்றி..?''

''எப்போது யார் என்னோடு பேசினார்கள்... நான் யாரோடு என்ன பேசினேன் என்பதையெல்லாம் காலவரிசைப்படி நினைவுபடுத்திக் கொள்வது... என்னால் மட்டுமல்ல... எவராலும் சாத்தியப்படாதது. ஓர் அரசு புதிதாக அமையும்போது, எந்தவொரு துறைக்கும் வரப்போகும் புதிய அமைச்சர் யார் என்பதை தெரிந்துகொள்வதில் பல்வேறு நிறுவனங்களும், தொழிலதிபர்களும், ஊடகங்களும் ஆர்வம் காட்டுவார்கள். இது இயற்கை. உதாரணமாக, 'ஆ.இராசாவுக்கு அமைச்சரவையில் மீண்டும் இடமில்லை' என்று பல டி.வி. சேனல்கள் ஒளிபரப்பின. அதற்காக அந்த சேனல்கள், பிரதமரின் அதிகாரத்தில் தலையிட்டன என்று சொல்ல முடியுமா? பிரதமரிடம் கேட்டுக்கொண்டா அப்படி அவர்கள் செய்தி வெளியிட்டார்கள்? இவையெல்லாம் அனுமானங்கள் மட்டுமல்ல... அவர்களின் சுய விருப்பு வெறுப்புகளின் வெளிப்பாடும் உண்டு. இவற்றுக்கெல்லாம் எந்த அமைச்சரும் விளக்கமளிக்க முடியாது.

அந்த வகையில், இந்த முறை அரசு அமைந்தபோது, 'ஆ.இராசாவுக்கு மந்திரிப் பதவி உண்டா?’ உண்டு எனில் எந்த இலாகா என்பதை எனக்கு வேண்டியவர்களும் ஆராய்ந்திருக்கக்கூடும். 'இல்லையா' என்பதை அறிய வேண்டாதவர்களும் தெரிந்துகொள்ள முயற்சித்திருக்கக்கூடும். அந்த வகையில் என்னிடமும் பல அரசியல்வாதிகள், அதிகாரிகள், தொழிலதிபர்கள், ஊடக நண்பர்கள் அந்த நேரத்தில் வெவ்வேறு கருத்துகளை தெரிவித்துள்ளனர். ஆனால், தலைவர் கலைஞரைத் தாண்டி - காங்கிரஸ் தலைவர் சோனியா காந்தி, பாரதப் பிரதமர் ஒப்புதல் இன்றி இன்னொருவர் எனக்கு அமைச்சர் பதவியையோ குறிப்பிட்ட இலாகாவையோ தர முடியும் என்று நம்புகிற அளவுக்கு நான் அரசியலில் - நிருவாகத்தில் முட்டாள் அல்ல. எனவே, சில ஊடகங்கள் தங்கள் அறியாமைக்கு என்னை இரையாக்க வேண்டியதில்லை!.''

வினா: ''அந்த 'லாபியிஸ்ட்' பெண்மணி நீரா ராடியாவோடு நீங்கள் பேசுவதாக ஆடியோ உரையாடல் கூறுகிறது. அவருக்கும் உங்களுக்கும் எப்படி தொடர்பு ஏற்பட்டது?''

''நீரா ராடியா டாடா நிறுவனத்தின் அதிகாரப்பூர்வமான பொதுத் தொடர்பு அலுவலர். இது குறித்து டாடா நிறுவனம் தெளிவான பத்திரிகைச் செய்தியையும் வெளியிட்டுள்ளது. எந்தத் தொலைத்தொடர்புத் துறை அமைச்சருக்கும் இருக்கும் தலையாய பணிகளில் ஒன்று - இத்துறையில் உள்ள பி.எஸ்.என்.எல். உள்ளிட்ட தொலைபேசி நிறுவனங்களிடையே அரசோடு நல்லிணக்கத்தை ஏற்படுத்தி, வர்த்தகத்தை சீராக வைத்திருப்பதுதான். அந்த வகையில் ஏர்டெல் நிறுவனத்தின் தலைவர் சுனில் மிட்டல் பலமுறை என்னை சந்திக்கிறார். ரிலையன்ஸ் நிறுவனத்தின் தலைவர் அனில் அம்பானி என்னை சந்திக்கிறார். அதேபோல வோடஃபோன், ஏர்செல் போன்ற எல்லா நிறுவனங்களின் தலைவர்களோ, தலைமை அதிகாரிகளோ சந்திப்பதும் சாதாரணமானது. அந்த வகையில் 'டாடா டெலிகம்யூனிகேசன்' நிறுவனத்துக்காக நீரா ராடியா ஆபரேட்டர் கூட்டங்களிலும் இதர சந்திப்புகளிலும் கலந்துகொண்டுள்ளார். என்னிடம் பல்வேறு சட்டப்படியான கோரிக்கைகளை கடந்த காலத்தில் வலியுறுத்தியுள்ளார்.

ஆனால், ஒன்றைப் புரிந்துகொள்ளுங்கள்... ஒரு நிறுவனத்தின் தலைவரோ, அதிகாரியோ என்னை துறை சார்பாக சந்திக்கிறார் என்பதற்காக அவர் துறைக்கு வெளியேயும் மற்ற இடங்களிலும் செய்கிற அல்லது ஈடுபடுகிற காரியங்களுக்கு எல்லாம் என்னை சம்பந்தப்படுத்திப் பேசுவது முறையல்ல. என்னோடு ஒரு விருந்தில் ஒருவர் கலந்துகொண்டு படம் பிடித்துக்கொண்டார் என்பதற்காக, அவர் செய்யும் ஏனைய காரியங்களுக்கு நானே பொறுப்பு என்பதுபோல் செய்தி வெளியிட முயற்சிப்பது பத்திரிகை தர்மமல்ல என்பதை பத்திரிகை துறையிலே இருப்பவர்கள் உணரவேண்டும்.''

வினா: ''டாடா நிறுவனம் நீங்கள்தான் மறுபடியும் இந்த இலாகாவுக்கு அமைச்சராக வேண்டும் என்பதில் ஆர்வமாக இருந்ததாகவும் செய்திகள் வெளியாகியுள்ளது. 'தயாநிதி மாறன் மீண்டும் அமைச்சரானால் டெலிகாம் துறையிலிருந்து டாடா வெளியேற வேண்டும்' என்று ரத்தன் டாடா கூறியதாகவும் சொல்லப்படுகிறதே... இந்தளவுக்கு டாடா யோசிக்கக் காரணம் என்ன?''

''ஆங்கில சேனல் ஒன்றில் என்னுடைய தொலைபேசி உரையாடல் ஒளிபரப்பானது என்ற அடிப்படையில், அடுத்த நாள் பத்திரிகையைப் பார்த்து அதன் விவரங்களை (டெக்ஸ்ட்) படித்துப் பார்த்தேன். அதுகுறித்து மட்டுமே உங்களுக்கு என்னால் விளக்கமளிக்க முடியும். வேறு உரையாடல்கள் குறித்து எனக்குத் தகவல் இல்லை; எனவே, அது குறித்து நான் கருத்து சொல்வது நியாயமாக இருக்காது.''

வினா: ''2008-இல் இந்த ஸ்பெக்ட்ரம் ஒதுக்கீடு நடைபெற்ற சமயத்திலேயே வருமான வரி புலனாய்வுத் துறையினர் தொலைபேசிகளை ஒட்டுக்கேட்டு உரையாடல்களைப் பதிவு செய்துள்ளதாக சொல்லப்படுகிறது. அதில் நீரா ராடியா சில நிறுவனங்களுக்கு ஸ்பெக்ட்ரம் அலைவரிசை ஒதுக்கீடு செய்வதில் பேரம் பேசியதாகவும், சில நிறுவனங்களுக்கு முன் உரிமை கொடுக்கச் செய்வதற்கு அவர் முயற்சித்ததாகவும்கூட தகவல்கள் உள்ளனவே..?''

''அதில் நீரா ராடியா என்ன பேசியிருக்கிறார் என்பது தெரியவில்லை. ஆனால், எந்த ஒரு விதிமுறையும் யாரோ ஒரு தனி நபரால் மாற்றக்கூடிய அளவுக்கு அரசாங்கம் பலகீனமானதல்ல... நானும் சட்டம் படிக்காதவனல்ல!''

வினா: ''சில ஆவணங்களை வருமான வரியினர் சி.பி.ஐ. வேண்டுகோள்படி அனுப்பி வைத்ததாகவும், அதில் தங்கள் துறையிலும் இன்னும் சில அமைச்சகங்களிலும் நீரா ராடியா தலையிட்டு இடைத் தரகராகச் செயல்பட்டதாகவும்கூட செய்திகள் வருகிறதே?''

''ஓர் ஆவணத்தைப்பற்றி பேச இரண்டு பேருக்குத்தான் தகுதி உண்டு. ஒருவர் அந்த ஆவணத்தை எழுதியவர் அல்லது தயாரித்தவராக (Executor) இருக்கவேண்டும். இன்னொருவர், அந்த ஆவணத்தை வைத்திருப்பவராக (Custodian) இருக்க வேண்டும். நீங்கள் குறிப்பிடும் ஆவணங்களில் நான் இந்த இரு நிலைகளிலும் தொடர்புடையவன் அல்ல; எனவே, அது உண்மையா... போலியா என்பதை நான் தீர்மானிக்க முடியாது.''

வினா: ''ஸ்பெக்ட்ரம் அலைவரிசை ஏலம் எடுத்தவர்கள் வெளிநாட்டு முதலீடுகளை தவறான வழியில் கொண்டுவந்துள்ளார்கள் என்ற குற்றச்சாட்டு குறித்து தங்கள் கருத்தென்ன?''

''என்னுடைய துறையின் பணி என்பது உரிமங்கள் மற்றும் அவைகளுக்கான அலைவரிசை ஒதுக்கீடு மட்டுமே. உரிமங்கள் வழங்கிய பிறகு ஒரு நிறுவனம் கொண்டுவரும் அன்னிய முதலீடு பற்றி நாங்கள் விசாரிக்க வேண்டிய அவசியமில்லை. இதுகுறித்து ஆய்வு செய்ய வேண்டியது நிதி மற்றும் உள்துறை அமைச்சகங்களின் பணிதான்.''

வினா: ''இரண்டு துறைகளுக்கும் இடையே நடக்கும் ரகசியக் கடிதப் போக்குவரத்துகள் மீடியாக்களில் வெளி வருகிறது... இதன் பின்ன ணியில் எந்த சக்தி இருப்பதாகக் கருதுகிறீர்கள்?

''நான் பலமுறை எழுப்பும் கேள்விதான் இங்கும்... இந்தத் துறையில் நான் மட்டும் ஏன் கடுமையாக விமர்சிக்கப்படுகிறேன்... குற்றம் சாற்றப்படுகின்றேன்? புதிதாக நான் ஏதாவது சட்டம் கொண்டு வந்தேனா? அல்லது இருக்கிற சட்டத்தை தூக்கியெறிந்து விட்டேனா? இல்லையே! ஸ்பெக்ட்ரம் - அலைவரிசை இருப்பை வெளியுலகுக்கு காட்டாமல் மறைத்துவைத்துவிட்டு ஏர்டெல், ஏர்செல், வோடஃபோன் ஐடியா போன்ற 'ஏற்கெனவே இருக்கும்' நிறுவனங்கள் மட்டுமே தொடர்ந்து தொலைபேசி சேவை வழங்கினால், தொலைபேசி இணைப்புகளின் எண்ணிக்கையும் உயராது; மக்கள் அளிக்கவேண்டிய கட்டணமும் குறையாது. அதனால் புதிய நிறுவனங்களுக்கு வாய்ப்பு அளிக்கப்படவேண்டும் என்ற ஒழுங்குமுறை ஆணையத்தின் கொள்கையை பிடிவாதமாக இருந்து நிறைவேற்றினேன். கால் நூற்றாண்டு காலமாக தங்கள் கையில் மட்டுமே இருந்த தொழில், இன்னும் சிலபேருக்கு கை மாறுகிறது என்ற கோபத்தில் - ஒரு வர்த்தகக் கூட்டு (Cartel) உடைக்கப்படுகிறது என்ற எரிச்சலில் சிலர் இருந்திருக்கலாம். இது இயற்கையான, சராசரி வியாபார உணர்ச்சிதான். அதன் விளைவுகளையும் நான் எதிர்கொள்ளத்தான் வேண்டும்.

பிரதமர் இது குறித்து நன்றாகவே அறிவார். இந்த முயற்சியில் நான் இறங்காமல் இருந்திருந்தால் எனக்கு பிரச்சனையே இருந்திருக்காது. நாடாளுமன்றத்தில் இதுகுறித்து கேள்வி வந்தபோது, 'நான் தேங்கிக் கிடக்கும் சாக்கடையாக இந்தத் துறையில் இருக்க விரும்பவில்லை; நீரோட்டத்தில்தான் மின்சாரம் வெளிப்படும்' (I don't want to be a stagnated stinking pool.. Flowing water only explores current) என்று குறிப்பிட்டு இருக்கின்றேன். அதுமட்டுமல்ல, இந்தத் துறையில் எவ்வளவு அலைவரிசை கையிருப்பு இருக்கிறது என்று முதன்முதலில் இணையதளத்தில் வெளியிட்ட இந்தத் துறையின் ஒரே அமைச்சர் நான்தான் என்பதையும் நாடாளுமன்றத்தில் பதிவு செய்துள்ளேன். இவையெல்லாம் சிலருக்கு தொழில்ரீதியான பின்னடைவுகளை ஏற்படுத்தியிருக்கலாம்... அதன் காரணமாகவும் நான் குறி வைக்கப்படுகின்றேன்.''

வினா: ''இப்போது 3 ஜி ஏலத்தில் விட ஏற்பாடு நடப்பதுபோலவே அதற்கு முந்தைய 2 ஜி-யை ஏன் ஏலத்தில் விடவில்லை?அங்கேதானே சர்ச்சையின் அடிப்படையே எழுகிறது?''

''நல்லகேள்வி! இதை சில நாளிதழ்களும் எழுப்பியுள்ளன. 2 ஜி என்பது பொது விநியோகத் திட்டத்தில் வழங்கப்படும் அரிசி போன்றது. 3ஜி என்பதோ பிரியாணிக்கு பயன்படும் உயர்தர பாசுமதி அரிசி போல! பொது விநியோகத் திட்டத்தில் ஒரு கிலோ அரிசி ஒரு ரூபாய்க்கு வழங்கப்படுகிறது என்பதற்காக, பாசுமதி அரிசியை ஒப்பீடு காட்டி 'ஒரு ரூபாய் அரிசி விநியோகத்தால் அரசுக்கு நஷ்டம்' என்று சொன்னால் ஏற்றுக்கொள்வீர்களா? 2 ஜி சேவை என்பது சாதாரண மனிதனுக்கும் போய்ச் சேரவேண்டிய குரல் (Voice) சேவை. 3 ஜி என்பது வர்த்தக ஆவணங்களை அனுப்புவதற்கும், வீடியோ சினிமா போன்ற உயர்ரக சேவைக்கும் உரியது. 2 ஜி சேவை கல்வி, சுகாதாரம், கிராமிய வர்த்தகம் உள்ளிட்ட துறைகளில் கடைசி மனிதனுக்கும் பயன்படவேண்டிய ஒன்று. 3ஜி என்பது வர்த்தகம் சார்ந்த மற்றும் வசதி படைத்தவர்களுக்கு சேவை அளிக்கக் கூடியது. ஒழுங்குமுறை ஆணையம் உலக நாடுகளில் உள்ள நடைமுறைகளை எல்லாம் கருத்தில்கொண்டுதான், 3ஜி அலைவரிசையை ஏலம்விட வேண்டும் என்று பரிந்துரைத்துள்ளது. இப்போதைய இந்தியாவின் சமூகப் பொருளியல் புள்ளி விவரங்களின் அடிப்படையில், சாதாரண குரல் வழி சேவை வழங்கும் 2ஜி சேவைதான் சாதாரண சாமானிய மக்களுக்கு தேவையே தவிர, 3ஜி அல்ல! இன்னுமொரு 10, 20 ஆண்டுகள் கழித்து நிலைமை மாறலாம். 1994-ம் ஆண்டு 2ஜி சேவை வந்தபோது எத்தனை பேர்கள் செல்போனை பயன்படுத்தினார்கள்? இப்போது நிலை என்ன? அதேபோல கல்வி அறிவும், தொழில்நுட்ப தாக்கமும் சாதாரண மக்களிடையே உயருமானால் இன்னும் சில ஆண்டுகளுக்குப் பிறகு 3ஜி சேவைகூட எளிதாக்கப்படலாம்; படவேண்டும்! அப்போது, 4ஜி சேவையும் வந்துவிடும். இதுகுறித்து ஒழுங்குமுறை ஆணையம் உரிய முடிவுகளை சூழலுக்கு ஏற்ப எடுக்கும். இப்போதைய ஒழுங்குமுறை ஆணையத்தின் முடிவின்படி 3ஜி ஏலம் விடப்படுகிறது.''

வினா: ''இந்த உரிமங்களை பெற்ற கம்பெனிகளில் நீங்களோ உங்களுக்கு சம்பந்தப்பட்டவர்களோ முதலீடு செய்துள்ளதாக கூறப்படுகிறதே?''

''இது அப்பட்டமான, அரசியல் காழ்ப்புணர்ச்சி கலந்த பொய். ஒரு கம்பெனியின் பங்குகள் யார் யாருக்கு சொந்தம் என்பதை இணைய தளத்திலும் தெரிந்துகொள்ளலாம். தகவல் உரிமைச் சட்டத்தினாலும் தெரிந்து கொள்ளலாம்.''

வினா: ''கடந்த சில மாதங்களுக்கு முன்பு உங்கள் துறையைச் சேர்ந்த சீப்-போஸ்ட் மாஸ்டர் ஜெனரல் பாலி என்பவர் இரண்டு கோடியை கையூட்டு பெறும்போது சி.பி.ஐ-யிடம் கையும் களவுமாக பிடிபட்டுள்ளாரே? இதே அதிகாரியோடு கைதான அருண் டால்மியா உங்களுக்குத் தெரிந்தவர் என்றும் அவர் மீது அன்னியச் செலவாணி குற்றச்சாற்றுகள் இருக்கிற செய்தியும் வந்ததே?''

''அமைச்சர் என்ற முறையில், துறை சார்ந்த நிகழ்ச்சிகளிலும், வேறு தனியார் நிகழ்ச்சிகளிலும் பலர் என்னோடு கலந்துகொள்கிறார்கள். அவர்களை எல்லாம் அடையாளப்படுத்தி ஞாபகப்படுத்தி நேரடியாக தொடர்புபடுத்த எத்தனிப்பது சரியல்ல.. என்னுடைய பிறந்த நாளிலோ, வேறு விழாக்களிலோ, புத்தாண்டுக் கொண்டாட்டத்திலோ, பலர் பலரோடு என்னை சந்திக்க வருகிறார்கள்; புகைப்படம் எடுத்துக்கொள்கிறார்கள். படத்தில் இருக்கின்ற அனைவரோடும் தனிப்பட்ட பரிச்சயம் இருக்கவேண்டும் என்று பொதுவாழ்க்கையில் உள்ள ஒருவருக்கு அவசியமில்லை. நீங்கள் சொல்லுகின்ற நபர்மீது வழக்கு ஒன்று இருந்து - அந்த வழக்கில் என் பங்கோ, முயற்சியோ இருக்குமானால் வழக்கின் விசாரணையில் வெளிப்பட்டிருக்கும். அதுபற்றிய குற்றச்சாற்றேகூட என் மீது எதுவுமில்லை.''

வினா: ''நெருப்பில்லாமல் புகையுமா? இத்தனை மீடியாக்களும் ஸ்பெக்ட்ரம் விவகாரம் குறித்து விமர்சிக்க வேண்டிய அவசியம் என்ன?''

''ஊடகங்களுக்கு இவ்விஷயத்தில் எந்த சார்புத்தன்மையும் இல்லை என்று சொன்னால், பாமர மனிதன்கூட ஏற்றுக்கொள்ள மாட்டான். காரணம் தனியார் தொலை தொடர்பு நிறுவனங்கள், மீடியாக்கள் மூலமாக விளம்பரத்திற்காக மட்டும் ஆண்டொன்றுக்கு 2,000 கோடி வரை செலவு செய்கின்றன. இந்த விளம்பர வருமானத்தை எந்த பத்திரிகையோ சேனலோ இழக்க முன்வருமா? எனவே, ஊடகங்கள் இந்த விஷயத்தில் பல நேரங்களில் நியாயமாக செயல்படவில்லையென்றே எண்ணத் தோன்றுகிறது. நான் இந்த துறைக்கு பொறுப்பேற்றவுடன் என்னென்ன மாறுதல் அடைந்துள்ளது என்பதைப் பற்றி பத்திரிகைகளும் ஊடகங்களும் எழுதுவதில்லை. தொலைபேசி இணைப்பு எண்ணிக்கை உயர்ந்துள்ளது மட்டுமட்டுமல்ல... கட்டணம் குறைந்துள்ளது. நாட்டில் எல்லா பொருளும் விலை ஏற்றத்தில் உள்ளன. ஆனால், தொலைபேசிக் கட்டணம் மட்டுமே குறைந்து கொண்டே இருக்கிறது. மேலும் பல வசதிகள் கிடைக்கவுள்ளது. உள்ளூர் அழைப்பு 10 பைசாவுக்கும், அகில இந்தியக் கட்டணம் 25 பைசாவுக்கும் விரைவில் வரவுள்ளது. இப்படியிருக்க ஸ்பெக்ட்ரம் குறித்து ஒரு ஆங்கில பொருளாதார நாளேட்டில் இது 'இராஜாவின் அவமானம்' [It is Raja's shame] என்று எழுதினார்கள். நான் சொல்கின்றேன்... 'It is my pride' ஆம், இது எனது பெருமை!

நல்ல விஷயங்களைப் பாராட்டாவிட்டாலும் போகிறது... உண்மையை இவர்கள் பேச மறுப்பது ஏன்? அதற்கு பின்னால் உள்ள சக்திகள் எவை? சதி என்ன? அதுதான் இங்கே 'மில்லியன் டாலர்' கேள்வி!'

(ஜூனியர் விகடன் இதழுக்கு நன்றி)

Read more...

ஆ. இராசா பதவி விலகமாட்டார்: தில்லியில் கலைஞர் அறிவிப்பு

புதுதில்லி:
இரண்டாம் தலைமுறை ஸ்பெக்ட்ரம் ஒதுக்கீட்டில் முறைகேடு நடந்ததாக கூறப்படும் சிக்கலில் நடுவண் தொலைத் தொடர்புத் துறை அமைச்சர் ஆ. இராசா பதவி விலகமாட்டார் என்று முதலமைச்சர் கலைஞர் கூறியிருக்கிறார்.

நடுவண் திட்டக்குழுக் கூட்டம் உள்ளிட்ட பல்வேறு நிகழ்ச்சிகளில் பங்கேற்பதற்காக தமிழக முதலமைச்சர் கலைஞர் 2 நாள் பயணமாக காலை தில்லி வந்தார்.

தில்லி வானூர்தி நிலையத்தில் அவருக்கு நடுவண் அமைச்சர்கள் மு.க. அழகிரி,. ஆ.இராசா, து.நெப்போலியன், காந்திசெல்வன், மாநில அமைச்சர்கள் துரைமுருகன், பொன்முடி மற்றும் தி.மு.க. நாடாளுமன்ற உறுப்பினர்கள் சிறப்பான வரவேற்பு அளித்தனர்.

பின்னர் குடியரசு தலைவர் பிரதிபா பாட்டீலை அவரது மாளிகைக்குச் சென்று சந்தித்த கலைஞர், அடுத்த மாதம் 23ஆம் தேதி முதல் கோவையில் நடைபெறவிருக்கும் உலகத் தமிழ் செம்மொழி மாநாட்டிற்கான அழைப்பிதழை வழங்கி, மாநாட்டில் கண்டிப்பாக கலந்துகொள்ள வேண்டும் என்று கேட்டுக் கொண்டார். இந்த சந்திப்பின்போது, தி.மு.க. நாடாளுமன்றக் குழுத் தலைவர் டி.ஆர். பாலு, மகள் கனிமொழி, தலைமைச் செயலாளர் சிறீபதி ஆகியோர் உடனிருந்தனர்.

இதைத் தொடர்ந்து தமிழ்நாடு இல்லத்தில் செய்தியாளர்களிடம் பேசிய அவர், “உலகத் தமிழ் செம்மொழி மாநாட்டிற்கு நிச்சயமாக வருவதாக குடியரசு தலைவர் உறுதியளித்தார்” என்று தெரிவித்தார்.

ஸ்பெக்ட்ரம் ஒதுக்கீட்டு ஊழல் தொடர்பாக தி.மு.க.வைச் சேர்ந்த நடுவண் அமைச்சர் ஆ. இராசா மீது ஏராளமான குற்றச்சாற்றுகளை சுமத்தி அவர் பதவி விலகவேண்டும் என்று நாடாளுமன்றத்தில் எதிர்க்கட்சிகள் வலியுறுத்தி வருவது பற்றியும், இதை ஏற்று அவர் பதவியிலிருந்து நீக்கப்படுவாரா? அல்லது நீடிப்பாரா? என்றும் செய்தியாளர்கள் வினா எழுப்பினர். ஆனால், அதற்கு விடையளித்த முதலமைச்சர் கலைஞர், “உங்களுக்கெல்லாம் மகிழ்ச்சியான செய்தி எதையும் நான் கொண்டுவரவில்லை” என்று கூறி நடுவண் அமைச்சர் இராசா பதவி விலக மாட்டார் என்று மறைமுகமாக செய்தியாளர்களுக்கு உணர்த்தினார்.

முதலமைச்சர் கலைஞரின் புதல்வரும், நடுவண் அமைச்சருமான மு.க. அழகிரி, நாடாளுமன்றத்தில் எழுப்பப்பட்ட வினாக்களுக்கு பதில் அளிக்கவில்லை என்றும், இதுதொடர்பாக மக்களவைத் தலைவர் மீரா குமார் விடுத்த அழைப்பையும் அவர் நிராகரித்துவிட்டார் என்று கூறப்படுகிறதே? என்று செய்தியாளர்கள் கேட்டனர். இந்த விவரங்களையெல்லாம் நீங்கள் மு.க. அழகிரியிடமே கேட்டுத் தெரிந்துகொள்ளலாம் என்று தெரிவித்தார். ஆனால் செய்தியாளர்கள் விடாப்பிடியாக, “கட்சித் தலைவர் என்ற வகையில் மு.க. அழகிரியிடம் நீங்கள் விசாரிக்கலாமே?” என்று கேட்டனர். அதற்கு விடையளித்த கலைஞர், அப்படி விசாரித்தால் அதுபற்றி உங்களுக்குத் தெரியவருமே” என்று குறிப்பிட்டார்.

தமிழ்நாட்டில் மின் பற்றாக்குறை அதிகமாக இருப்பதாக எதிர்க்கட்சிகள் பரப்புரை செய்வது குறித்த வினாவிற்கு விடையளித்த கலைஞர்,
“இந்தியா முழுவதுமே மின்பற்றாக்குறை அதிகமாக உள்ளது. அதுபற்றி நான் விளக்கமாக அறிக்கை கொடுத்திருக்கிறேன். அதைப் படித்தால் உண்மை புரியும். மற்ற மாநிலங்களோடு ஒப்பிட்டால் தமிழ்நாட்டில் மின்வெட்டு அவ்வளவாக இல்லை என்பதை புரிந்து கொள்ளலாம்” என்று கூறினார். மின்பற்றாக்குறை குறித்து வெள்ளை அறிக்கை வெளியிடப்படுமா? என்று கேட்டபோது, தாம் அளித்துள்ள அறிக்கையே வெள்ளை அறிக்கை போன்றதுதான் எனக் கலைஞர் தெரிவித்தார்.

2ஆவது நாளாக திங்கட்கிழமையும் தில்லியில் தங்கியிருக்கும் முதலமைச்சர் கலைஞர் காலை நடுவண் திட்டக்குழு துணைத் தலைவர் மான்டெக்சிங் அலுவாலியாவைச் சந்தித்து தமிழகத்திற்கான திட்ட ஒதுக்கீடு குறித்து பேச்சு நடத்த உள்ளார். பிரதமர் மன்மோகன் சிங், காங்கிரசு தலைவர் சோனியா காந்தி ஆகியோரையும் அவர் சந்தித்துப் பேசவுள்ளார். பிரதமருடனான சந்திப்பின்போது, சேலம் இரும்பு ஆலைக்காக நிலம் அளித்தோரின் வாரிசுகளுக்கு வேலை வழங்குவது தொடர்பாக வலியுறுத்த இருப்பதாக கலைஞர் கூறினார்.

மான்டெக்சிங் அலுவாலியவுடனான சந்திப்பின்போது திட்டக்குழுவில் தமிழத்தின் ஒதுக்கீட்டாக எவ்வளவு தொகை கேட்கப்பட்டது? எவ்வளவு தொகை ஒதுக்கப்பட்டது? என்னென் திட்டங்களுக்காக நிதியை ஒதுக்கக் கோரினோம்? என்னென்ன திட்டங்களுக்காக நிதி உதவி கோரினோம் என்பது பற்றியெல்லாம் சந்திப்பு முடிந்த பிறகு நானே உங்களைச் சந்தித்து தெரிவிப்பேன் என்று முதலமைச்சர் கலைஞர் செய்தியாளர்களிடம் கூறினார்.

Read more...

சமூகத்துக்கு பயன்படுவதே சிறந்த கல்வி: அமைச்சர் ஆ.இராசா

அப்பலோ கல்வி குழுமத்தின் சார்பில் பட்டமளிப்பு விழா சென்னை வாணிமகால் அரங்கில் வெள்ளிக்கிழமை மாலை நடைபெற்றது. இவ்விழாவின் சிறப்பு விருந்தினராக நடுவண் தொலைத் தொடர்பு மற்றும் தகவல் தொழில்நுட்பத் துறை அமைச்சர் ஆ.இராசா கலந்துகொண்டார்.

மாணவர்களுக்கு பட்டங்களை வழங்கிய அமைச்சர் பேசியதாவது:

ஒரு நதி எப்படி கடலில் கலப்பதையே நோக்கமாக கொண்டு செயல்படுகிறதோ, அது போல் நீங்கள் அனைவரும், ஒரு இலட்சியத்துடன் உங்கள் வாழ்க்கையை அமைத்துக் கொள்ள வேண்டும். நல்லவர்கள் நதி நீரை பருகுவார்கள். கெட்டவர்கள் அதில் கல்லை விட்டெறிவார்கள். ஆனாலும் நதி ஓடிக் கொண்டே இருக்கிறது. கடைசியில் அது கடலில் கலக்கிறது. அதுபோல், நீங்களும் உங்கள் பாதையில் குறுக்கிடுவதை புறக்கணித்து விட்டு பயணப்பட வேண்டும்.

கடந்த 1999-ஆம் ஆண்டு மத்திய அரசு தொலைத் தொடர்பு கொள்கை வகுத்தபோது, 2012 ஆம் ஆண்டுக்குள் 60 கோடி தொலைப்பேசி இணைப்புகள் வழங்கப்பட வேண்டும் என இலக்கு நிருணயிக்கப்பட்டது. ஆனால், 2010-ஆம் ஆண்டிலேயே கடந்த மாதமே நம் நாடு இந்த இலக்கை அடைந்துவிட்டது.

பல்வேறு துறைகளிலும் நாடு முன்னேறிக் கொண்டிருக்கிறது. எனவே, அறிவார்ந்த சமுதாயம் என்பது சமூகத்தை முன்னேற்ற பயன்பட வேண்டும். சமுகத்திற்கு பயன்படுவதே சிறந்த கல்வி.

இவ்வாறு அமைச்சர் ஆ.இராசா பேசினார்.

இந்தப் பட்டமளிப்பு விழாவில், அப்பல்லோ கல்வி குழுமத்தின் தலைவர் சுப்பிரமணி, முதல்வர் சுதாகர் மற்றும் பேராசிரியர்கள், மாணவர்கள் உள்ளிட்டோர் கலந்துகொண்டனர்.

Read more...

ஸ்பெக்ட்ரம் விசாரணைக்கு தயார்: அமைச்சர் ஆ.இராசா சவால்

ஸ்பெக்ட்ரம் ஏல ஒதுக்கீட்டில் முறைகேடு எதுவும் நடக்கவில்லை. இது குறித்த எந்தவித விசாரணைக்கும் தயாராக இருக்கிறேன் என்று நடுவண் தகவல் தொடர்பு மற்றும் தொலைத் தொடர்புத் துறை அமைச்சர் ஆ.இராசா தில்லி மேல் சபையில் கூறினார்.

2008 ஆம் ஆண்டு 2 ஜி ஸ்பெக்ட்ரம் எனப்படும் இரண்டாம் தலைமுறை அலைக்கற்றை அலைவரிசைகளை ஏலம் விட்டதில் 20 ஆயிரம் கோடி ரூபாய் அளவிற்கு மத்திய அரசுக்கு வருவாய் இழப்பு ஏற்பட்டதாக எதிர்க்கட்சிகள் குற்றம் சாட்டின. இந்த நிலையில் 3 ஜி ஸ்பெக்ட்ரம் எனப்படும் மூன்றாம் தலைமுறை ஒளிக்கற்றை அலைவரிசைகள் தற்போது ஏலத்தில் ஒதுக்கீடு செய்யப்பட்டு வருகிறது.

இது குறித்து தில்லி மேல் சபையில் துணை மானிய கோரிக்கைக்கு பதில் அளித்து பேசிய மத்திய தொலை தொடர்பு மற்றும் தகவல் தொழில் நுட்பத் துறை அமைச்சர் ஆ.இராசா கூறியதாவது:

2 ஜி ஸ்பெக்ட்ரம் அலைக்கற்றை ஒதுக்கீடு தொடர்பாக சி.பி.ஐ.யில் ஒரு வழக்கு இருப்பது எனக்குத் தெரியும். இது குறித்து எத்தகைய விசாரணையையும் சந்திக்க நான் தயாராக இருக்கிறேன். அலைக்கற்றை ஒதுக்கீடு தொடர்பான அனைத்துக் கேள்விகளையும் எதிர்கொள்ளும் விதமாக அது குறித்த அனைத்து தகவல்களையும் தரத் தயாராக இருக்கிறோம். தற்போது 3 ஜி அலைக்கற்றை ஏலம் முழுவதும் வெளிப்படையான முறையில் நடத்தப்படுகிறது. இதனை மத்திய ஊழல் கமிஷனும், இதர அமைப்புகளும் கண்காணித்து வருகின்றன. 3 ஜி அலைக்கற்றை ஏல ஒதுக்கீடு பொதுத்துறை நிறுவனமான பி.எஸ்.என்.எல்.லின் கொள்கை முடிவாகும். இந்த அலைக்கற்றைகளை ஏலம் விடுவதில் தாமதம் ஆனதற்கு காரணம் ரேடியோ அலைவரிசைகள் கிடைக்காததும், இவற்றில் எத்தனை பேருக்கு அனுமதி வழங்குவது என்பதில் நிலவிய கருத்து வேறுபாடுகளும்தான்.

3 ஜி அலைக்கற்றை ஏல ஒதுக்கீட்டுக்கான வழிகாட்டு நெறிமுறைகள் 2008 ஆம் ஆண்டு ஆகஸ்டு மாதம் உருவாக்கப்பட்டு பின்பு அதே ஆண்டு செப்டம்பர் மாதம் சிறு திருத்தம் செய்யப்பட்டது. எனினும், 3 ஜி அலைக்கற்றைகளை பெறுவது, எத்தனை தொகுதிகளாக அவற்றை ஏலத்தில் விடுவது, மற்றும் முன் நிர்ணயவிலை ஆகியவை தொடர்பான சில பிரச்சினைகளால் ஏலம் விடுவதில் தாமதம் ஏற்பட்டது.

ஸ்பெக்ட்ரம் மூலம் அரசுக்கு ரூ. 45 ஆயிரம் கோடி கிடைக்கும்

கடந்த ஆண்டு 3 ஜி அலைக்கற்றை ஏலம் விடுவதை கவனித்துக் கொள்ள மத்திய அமைச்சர்கள் கொண்ட குழுவிற்கு அதிகாரம் அளிக்கப்பட்டது. இந்த அமைச்சர்கள் குழு சில தடவை சந்தித்த பின்பு, ஏலத்தை விடுவதற்கு முடிவு செய்தது. அதன்படி இந்த ஆண்டு ஏப்ரல் 9 -ஆம் தேதி முதல் 3 ஜி அலைக்கற்றை ஏலத்தில் விடப்பட்டு வருகிறது. இந்த ஏலத்தின் மூலம் 35 ஆயிரம் கோடி ரூபாய் கிடைக்கும் என்று மத்திய அரசு முதலில் எதிர்பார்த்தது. ஆனால் இது 45 ஆயிரம் கோடி ரூபாயை தாண்டி விடும் என்று தற்போது மதிப்பிடப்பட்டு இருக்கிறது.

இவ்வாறு அமைச்சர் ஆ.இராசா, ஸ்பெக்ட்ரம் பற்றி தனது கருத்தை தெளிவாக எடுத்துரைத்தார்.

Read more...

மாற்றுத் திறனாளிகளுக்கு உதவி : அமைச்சர் ஆ.இராசா வழங்கினார்

பெரம்பலூர் மாவட்ட ஆட்சியர் அலுவலகத்தில் நடுவண் தொலைத் தொடர்பு மற்றும் தகவல் தொழில்நுட்பத் துறை அமைச்சர் ஆ.இராசா, நடுவண் சமூக நீதி மற்றும் அதிகாரமளிப்பு துறை அமைச்சர் து.நெப்போலியன் ஆகியோர் மாற்றுத் திறனாளிகளுக்கு நலத் திட்ட உதவிகளை வழங்கினர். மாவட்ட ஆட்சியர் மா.விஜயக்குமார், சட்டப்பேரவை உறுப்பினர் இராஜ்குமார் ஆகியோர் கலந்துகொண்டனர். ..................................................................................................................................

புதிய வங்கிக் கிளை திறப்பு

பெரம்பலூர் மாவட்டம் குரும்பலூரில் புதிய வங்கி கிளையை நடுவண் தொலைத் தொடர்பு மற்றும் தகவல் தொழில்நுட்பத் துறை அமைச்சர் ஆ.இராசா திறந்துவைத்தார். இந்த நிகழ்வில், நடுவண் சமூக நீதி மற்றும் அதிகாரமளிப்பு துறை அமைச்சர் து.நெப்போலியன், மாவட்ட ஆட்சியர் மா.விஜயக்குமார், சட்டப்பேரவை உறுப்பினர் இராஜ்குமார், மண்டல மேலாளர் வதராசன் ஆகியோர் கலந்துகொண்டனர்.

.............................................................................................................
நோயர் குணமடைய அமைச்சர் வாழ்த்து

பெரம்பலூர் அற்புதா மருத்துவமனைவில், கலைஞர் காப்பீட்டுத் திட்டத்தில் அறுவை சிகிச்சை செய்துகொண்டவர்களை நடுவண் அமைச்சர்கள் ஆ.இராசா, து.நெப்போலியன் ஆகியோர் சந்தித்து, முதல்வர் கலைஞர் அவர்களின் வாழ்த்து கடிதத்தை வழங்கினர். மாவட்ட ஆட்சியர் மா.விஜயக்குமார், சட்டப்பேரவை உறுப்பினர் இராஜ்குமார் ஆகியோர் உடனிருந்தனர்.

Read more...

அம்பேத்கர், பெண்ணுரிமைக்காக போராடவில்லையா? : அமைச்சர் ஆ.இராசா பேச்சு

பெரியார் பேசிய அளவிற்கு, போராடிய அளவிற்கு அம்பேத்கரை ஒரு பெண்ணுரிமைப் போராளியாக அடையாளப்படுத்த முடியவில்லை என்று சொல்லுகிறார்கள். அம்பேத்கர் பெண்ணுரிமைக்காக தனியாகக் குரல் கொடுக்கவில்லை என்பது உண்மைதான். ஆனால், அவருடைய குரல் வேறு விதமாக இருக்கிறது.

Rise and fall of Hindu women என்று ஒரு சிறு நூலை எழுதியிருக்கிறார். பெரியார் பெண் விடுதலையை பகுத்தறிவிலிருந்து - பகுத்தறிவுத் தளத்திலேயிருந்து பார்த்தார். அம்பேத்கர் ஜாதி ஒழிய வேண்டுமென்று விரும்பினார், பெரியாரைப் போலவே ஆய்வு செய்தார், எழுதினார், எல்லாம் உண்மைதான். ஆனால், விடுதலையை ஒரு ஆன்மீகத் தளத்திலிருந்து பார்க்க விரும்பினார். பவுத்தத்திற்குப் போனார். பவுத்தத்தில் பெண்களுக்கு எல்லா உரிமையும் இருந்தது. அதைவிட அம்பேத்கரை நாம் அறிந்துகொள்ளவேண்டிய ஒரு இடம். நான் அதற்குப் பின்னால் வருகிறேன்.

பெரியார் செய்த காரியத்தை, பிரச்சாரம் செய்த காரியத்தை அம்பேத்கர் மிகச் சாதுர்யமாக அரசியல் சட்டத்திலே கொண்டு வர முயற்சி செய்தார் என்பதை நான் அடுத்த ஓரிரு நிமிடங்களில் சொல்ல இருக்கிறேன். இந்த இடத்திலே வருகிற பொழுது Suppression of women, Mf Graded inequality, Prohibition of education, Prohibition of ower Ban on property, Suppression of women- இதுதான்.

இந்த இந்துயிசம் இந்த ஐந்து கோட்பாடுகளை வைத்திருக்கிறதே இதனுடைய விளைவு இந்த சமூகத்தில் மட்டும்தானா? அரசியலில் கிடையாதா என்றால் அரசியலில் இந்த சமூகத்தினுடைய அமைப்பின் சார்ந்த சாரம் எல்லா இடங்களிலேயும் ஒரு மிகப்பெரிய சிக்கலை ஏற்படுத்தியிருக்கிறது.

பெருஞ்சித்திரனார் ரொம்ப அழகாகச் சொல்லுவார்- இந்த நாட்டினுடைய விடுதலையை நான் குறைவுபடுத்தவில்லை, நான் இந்திய அரசாங்கத்தினுடைய அமைச்சர், என்னுடைய காரில் தேசியக்கொடி பறந்துகொண்டிருக்கிறது. எனக்கு தேசப்பற்று இருந்தாக வேண்டும். ஆனால் வரலாற்றைச் சொல்லுகிற பொழுது சரியாகச் சொல்லவேண்டும் பெருஞ்சித்திரனார் சொல்லுகிறார்:

வெள்ளைக்காரர்களுக்கு வால்பிடித்தார்களா?

நல்லவேளை வெள்ளைக்காரன் வந்தான், நம்மையெல்லாம் காப்பாற்றினான், அவன் மட்டும் வராமல் போயிருந்தால் நாமெல்லாம் நரியாக, பூனையாக ஊளையிட்டுக்கொண்டிருந்திருப்போம். இதை நாம் மறுப்பதற்கில்லை. அதனால்தான் பெரியார் மீதும் அம்பேத்கர் மீதும் ஒரு மிகப்பெரிய குற்றச்சாட்டு இருக்கிறது. இவர்கள் வெள்ளைக்காரர்களுக்கு வால்பிடித்தார்கள். சுதந்திரம் வேண்டாம் என்று பெரியார் சொன்னார். அம்பேத்கர் இன்னும் வேகமாக ஒரு இடத்திலே சொன்னார். பெரியாருக்கும் அம்பேத்கருக்கும் இருக்கிற ஒற்றுமையைப் பார்க்க வேண்டும்.

பெரியார் சுதந்திரத்தைப் பற்றிப் பேசுகிற போது, வெள்ளைக்காரர்கள் கொள்ளைக்கார பிராமணர்களுக்கு எழுதிக் கொடுத்த மேட் ஓவர். - இந்த வார்த்தையை அய்யா அப்படியே சொல்லியிருக்கிறார்:

சுதந்திரம் என்பது வெள்ளைக்காரர்கள் கொள்ளைக்கார பிராமணர்களுக்கு எழுதிக் கொடுத்த மேட் ஓவர். நான் ஏற்றுக்கொள்ளவில்லை என்றார். இதைச் சொல்லுகிற போது 1947. ஆனால் இது 1937 , 39லேயே அம்பேத்கருக்கு ஒரு சங்கடம் வருகிறது.

இரண்டாம் உலகப்போர் வந்த போது அந்த இரண்டாம் உலகப்போரில் வின்சென்ட் சர்ச்சில் இங்கிலாந்தினுடைய பிரதமர். நம்முடைய நாடு அவருக்குக் கீழே இருக்கிறது. அவர் ஹிட்லரை எதிர்க்கவேண்டும் என்பதற்காக இந்தியத் துருப்புகளைப் பயன்படுத்துகிறார். யாருக்கு எதிராக? நாஜிப்படைகளுக்கு எதிராக. ஹிட்லருக்கு எதிராக இந்தியாவினுடைய துருப்புகளை அவர் பயன்படுத்துகிற பொழுது, காந்தி ஒரு கேள்வியை வைக்கிறார் காங்கிரஸ் சார்பில்.

என்ன கேள்வி என்றால் ``வின்சென்ட் சர்ச்சில் அவர்களே, உங்களுக்கு எதிரி ஹிட்லர், எங்களுக்கு அல்ல. இந்தப் போரில் எங்களுடைய சிப்பாய்களை, எங்களுடைய துருப்புக்களை, எங்களுடைய ஆயுதங்களை நீங்கள் பயன்படுத்தப்போகிறீர்கள். இந்த வெற்றிக்குப் பின்னால் எங்களுக்குக் கிடைக்கப் போவது என்ன?’’ என்று கேட்கிறார்.

What will be the benefit after the war, having deployed our sources? இது காந்தி வைக்கிற கேள்வி, வின்சென்ட் சர்ச்சிலுக்கு. வின்சென்ட் சர்ச்சில் ரொம்ப அமைதியாக பதில் சொன்னார்: To restore traditional Britain -நான் என்னுடைய மரபுமிக்க தொன்மைமிக்க பெருமை மிக்க பிரிட்டனை நான் மீண்டும் பெறுவதற்காகத் தான் போராடப் போகிறேன்.

எவ்வளவு பெரிய கொழுப்பு? காந்தியாருக்குக் கோபம். என்னுடைய சகோதரன் இரத்தம் இழக்கிறான். என்னுடைய சகோதரன் வாழ்வை இழக்கப்போகிறான். குற்றுயிரும், குலைஉயிருமாக இளம் மனைவிகளை இழக்கப்போகிற கணவனை என் கண்ணெதிரிலே பார்க்கிறேன். ஆனால் நீ சொல்லுகிறாய், To restore traditional Briton உன்னுடைய சிப்பாய்களை நான் கொல்லப்போகிறேன் என்று சொன்னால் இது உனக்குத் திமிரல்லவா என்று கேட்கிறார். இது யங் இண்டியாவில் வருகிறது.

காந்தியை தடுமாறவைத்த அம்பேத்கர்!
அடுத்தநாள் அம்பேத்கர் கேட்கிறார். Yes, the question that was asked by Mr.Gandhi is legitimate காந்தி கேட்கிற கேள்வி ரொம்ப நியாயமான கேள்வி. ஆனால் திரும்ப நான் கேட்கிறேன் காந்தியை. வின்சென்ட் சர்ச்சிலுக்கு சிப்பாயை அனுப்பிவிட்டு என்ன பயன் என்று கேட்கிறாயே? நான் கேட்கிறேன், இந்தியாவிற்கு சுதந்திரம் வேண்டுமென்று நீ கேட்கிறாயே, அந்த சுதந்திரத்திற்குப் பின்னால் எனக்கும் பிற்படுத்தப்பட்டவனுக்கும் பற, பள்ளனுக்கும் என்ன கிடைக்கப் போகிறது? What will be the social order after independence since you are fighting for independence? இந்தக்கேள்விக்குப் பதில் சொல்லிவிட்டு நீ அவனுக்குக் கேள் என்று அம்பேத்கர் கேட்டபோதுதான் காந்தி தடுமாறிப் போனார்.

இது வரலாறு. இதைத் தான் தந்தை பெரியார் வெள்ளைக்காரர்கள் கொள்ளைக்கார பிராமணர்களுக்கு எழுதிக்கொடுத்த மேட் ஓவர் என்று சுதந்திரத்தைச் சொல்கிறார்.

Read more...

செல்பேசிகள் மூலம் சுகாதாரம், கல்வி, வணிகச் சேவைகள் குறித்து ஆய்வு : அமைச்சர் ஆ.இராசா

புது தில்லி:

சுகாதாரம், கல்வி, வேளாண்மை, வணிகம் போன்ற பல்வேறு துறைகளில் பொது மக்களுக்கு மொபைல் போன்கள் மூலம் சிறப்பான சேவைகள் அளிப்பது குறித்து விரிவாக ஆராய வேண்டும் என்று மத்திய தொலைத் தொடர்பு மற்றும் தகவல் தொழில்நுட்பத் துறை அமைச்சர் ஆ. இராசா கேட்டுக் கொண்டுள்ளார்.

புது தில்லியில் 7.4.2010 அன்று டிராய் எனப்படும் இந்திய தொலைத் தொடர்பு ஒழுங்குமுறை ஆணையத்தின் சார்பில் உள்ளடக்கிய வளர்ச்சி மற்றும் நீடித்த முன்னேற்றத்திற்கு செல்பேசி பயன்பாடுகள் என்பது குறித்த தேசிய கருத்தரங்கு நடைபெற்றது.

இதில் கலந்து கொண்ட அமைச்சர் ஆ.இராசா உரையாற்றுகையில், “நம்முடைய பொருளாதாரத்தின் விரைவான வளர்ச்சிக்கும் பல்வேறு துறைகளின் நவீனமயமாக்கலுக்கும் தொலைத் தொடர்புகள் ஒரு முக்கிய ஆதரவு சேவையாக உருவாகியுள்ளது. தகவல் மற்றும் தொலைத் தொடர்பு தொழில்நுட்ப வசதிகள் சிறந்த தகவல்கள் கிடைப்பதற்கு உதவுவதுடன் பொது மக்களின் சிறப்பான கல்விக்கும் சமூக இணைப்பு முன்னேற்றத்திற்கும் மேம்பட்ட வணிக வாய்ப்புகளுக்கும் உதவுகிறது. இன்றைக்கு இந்திய தொலைத் தொடர்பு இணைப்பானது உலகில் வேகமாக வளர்ந்து வரும் தகவல் தொழில்நுட்பம் மற்றும் தொலைத் தொடர்பு தொழில்நுட்ப சந்தையில் இரண்டாவது பெரிய தொலைத் தொடர்பு இணைப்பாகத் திகழ்கிறது. இவ்வாண்டு பிப்ரவரி மாதம் வரை 60 கோடி தொலைபேசி சந்தாதாரர்கள் உள்ளனர். 2014-ஆம் ஆண்டில் இது 100 கோடியாக உயரும் என்று எதிர்பார்க்கப்படுகிறது. பிப்ரவரியில் மட்டும் 18 மில்லியன் சந்தாதாரர்கள் அதிகரித்துள்ளனர். கிராமப்புற பகுதிகளில் 32 சதவீத தொலைபேசிகள் உள்ளன’’ என்று குறிப்பிட்டார்.

”வெகு அண்மைக்காலம் வரை செல்பேசிகள் (மொபைல் போன்கள்) குரல் மற்றும் வார்த்தை செய்திகள் அனுப்புவதற்கு மட்டுமே பயன்படுத்தப்பட்டன. ஆனால் தற்போது அடிப்படையான குரல் சேவைகளையும் தாண்டி இணையம் மற்றும் அகண்ட அலைவரிசை சேவைகளையும் அளிக்கக் கூடிய வகையில் உள்ளன. அகண்ட அலைவரிசை சேவையின் பரவல் நம்நாட்டில் குறைவாக உள்ளது. நிலையான கம்பிவட இணைப்புகளுக்கு மட்டுமே தற்போது அகண்ட அலைவரிசை அளிக்கப்படுகிறது. இந்த கம்பிவட இணைப்பு அகண்ட அலைவரிசை வழங்குவதற்கு உகந்ததாக இல்லை. 3ஜி அலைவரிசை தற்போது ஏலம் விடப்பட்டு இருப்பதால் சேவைகளை தனியார் நிறுவனங்களும் வழங்க முடியும். இந்த 3ஜி அலைவரிசை மூலம் கம்பிவடம் இல்லாத அகண்ட அலைவரிசை சேவைகளையும் வழங்க முடியும். இதன் மூலம் அதிகளவில் அகண்ட அலைவரிசை சேவை கிடைக்கும்’’ என்றும் அமைச்சர் ஆ.இராசா தெரிவித்தார்.

”பல்வேறு சேவைகளை வழங்குவதில் மிக சக்தி வாய்ந்த ஒரு சாதனமாக செல்பேசிகளின் பயன்பாடு உருவாகி இருக்கிறது. இதன் பயனாக கணினி, தொலைக்காட்சி, திரையரங்கம் ஆகியவற்றுக்கு அடுத்தபடியாக நான்காவது திரையாக செல்பேசி உருவாகியிருக்கிறது.
அடிப்படையான தொலைத் தொடர்பு சேவைகள் மட்டுமின்றி செல்பேசி - ஆளுமை, செல்பேசி-வணிகம், செல்பேசி - கல்வி, செல்பேசி -வேளாண் , செல்பேசி - சுகாதாரம் போன்ற சமூக நன்மைக்கான மேம்பட்ட சேவைகளை செல்பேசிகள் மூலம் அளிக்க வேண்டிய அவசியத்தை இது உணர்த்துகிறது. செல்பேசிகளின் பயன்களை தொழில்நுட்ப முன்னேற்றங்கள் அதிகப்படுத்தியுள்ளன. கணினி செயல்பாடுகள், மென்பொருள், மல்டி மீடியா, விளையாட்டு மற்றும் இ படிப்பு போன்ற மேம்பட்ட வசதிகள் காரணமாக ஸ்மார்ட் செல்பேசிகள் அதிக அளவில் பிரபலமடைந்து வருகின்றன. 2015-ஆம் ஆண்டில் கப்பலில் அனுப்பப்படும் மூன்றில் ஒரு பங்கு செல்பேசிகள் ஸ்மார்ட் செல்பேசிகளாக இருக்கும் என்று கணிக்கப்பட்டுள்ளது’’ என்றும் அவர் கூறினார்.

”தற்போது இந்தியாவில் சுமார் 80 முதல் 90 இலட்சம் ஸ்மார்ட் போன்கள் உள்ளன. இது வருங்காலத்தில் வேகமாக உயரும் என எதிர்பார்க்கப்படுகிறது. வளர்ச்சி மற்றும் செல்பேசிகளின் பயன்பாட்டை அதிகப்படுத்த வேண்டிய தேவையுள்ளது. இந்தியாவில் பொழுது போக்கு, தகவல், விளம்பரம் மற்றும் சமூக இணைப்பு ஆகியவற்றுக்காக மட்டுமே தற்போது செல்பேசிகள் பயன்படுத்தப்படுகின்றன.
கட்டணங்களை கட்டுதல், தொடர்வண்டி பயணச்சீட்டு முன்பதிவு செய்தல், பணபரிமாற்றம் ஆசிய வணிக சேவைகளுக்கும் செல்பேசிகள் பயன்படுத்தப்படுகின்றன. செல்பேசிகளின் வணிக சேவை துறையில் பல்வேறு நடவடிக்கைகள் எடுக்கப்பட்ட போதும் இன்னும் அவை தொடக்க நிலையிலேயே உள்ளன. உருவாகி வரும் புதிய தொழில்நுட்பங்களைப் பயன்படுத்தி பொது மக்களுக்கு சிறந்த முறையில் சேவை செய்வதில் அரசு அக்கறையுடன் உள்ளது. சுகாதாரம், கல்வி, வேலை வாய்ப்பு, காவல் துறை, செலுத்துதல், நீதி மற்றும் சட்ட சேவைகள் போன்றவை தொடர்பான பல்வேறு வகையான அரசு சேவைகளை செல்பேசிகள் மூலம் அளிக்க முடியும்’’ என்றும் அமைச்சர் ஆ.இராசா குறிப்பிட்டார்.

”கிராமப்புற மக்களில் பெரும்பாலோர் ஒரு வங்கிக் கணக்கைகூட வைத்திருக்கவில்லை என்பதை தேசிய மாதிரி ஆய்வு புள்ளிவிவரம் தெரிவிக்கிறது. அடிப்படையான நிதிச் சேவைகள் பெறுவதற்குகூட அவர்களுக்கு வசதியில்லை என்பதையே இது எடுத்துக் காட்டுகிறது. விவசாயக் குடும்பங்களில் 13 விழுக்காட்டினர் மட்டுமே வங்கிக் கடன்கள் பெறுகின்றனர். எல்லா கிராமப்புற பகுதிகளிலும் வங்கிக் கிளைகள் இல்லாததே இதற்கு அடிப்படை காரணமாகும். வங்கிகளுடன் தொடர்பு இல்லாதவர்களுக்கு செல்பேசி மூலம் வங்கிச் சேவை அளிப்பது பயனுடையதாக அமையும். செல்பேசி - வங்கிச் சேவைக்காக மத்திய தொலைத் தொடர்பு மற்றும் தகவல் தொழில்நுட்ப அமைச்சகம் துடிப்புடன் பணியாற்றி வருகிறது. இத்திட்டம் அடுத்த சில மாதங்களில் தொடங்கும் என எதிர்பார்க்கப்படுகிறது’’ என்றும் அமைச்சர் கூறினார்.

”அண்மையில் அனைவருக்கும் கல்வி உரிமையை அரசு அறிமுகப்படுத்தியது. கிராமப்புற மற்றும் தொலை தூரப் பகுதிகளில் முறையான கல்வி நிறுவனங்கள் குறைவாக உள்ளன. அதற்கு செல்பேசி கல்வி முறை சிறப்பானதாக இருக்கும். இதே போல சுகாதாரச் சேவைகள், வேளாண் சேவைகள் போன்றவற்றையும் செல்பேசிகள் மூலம் சிறந்த முறையில் வழங்க முடியும். ஒவ்வொரு தனிநபருக்கும் தனிப்பட்ட முறையில் சேவைகளை வழங்குவதற்கு செல்பேசிகளின் பயன்பாடு குறித்து ஆராய்வதற்கான நேரம் தோன்றியுள்ளது. அந்த வகையில் செல்பேசிகளின் பயன்பாட்டு வளர்ச்சிக்கு நிறைய வாய்ப்புள்ளது. அத்திசையில் இந்த கருத்தரங்கம் ஒரு முக்கிய நடவடிக்கையாகும்’’ என்றும் அமைச்சர் ஆ.இராசா சுட்டிக்காட்டினார்.

Read more...